Киләчәк – яшьләр кулында

Муниципаль район хакимиятендә эшкуарлык сәгатендә яшь кушнаренколылар кызыклы бизнес-идеяләр тәкъдим итте.

Сайтлар һәм программалар эшләү белән шөгыльләнүче җиденче сыйныф укучысы «Кушфорум» социаль челтәрен тәкъдим итте. Бу мәйданчыкта кушнаренколылар кызыксынулары буенча аралаша, район яңалыклары белән таныша, белдерүләр укый, сату-сатып алу белән шөгыльләнә алачак.

Үлән чәе җитештерү буенча икенче проект киңәшмәдә катнашучыларда шулай ук кызыксыну тудырды. Унөч-ундүрт яшьлек малайлар шифалы үләннәр җыюны оештырганнар да инде. Алар әзер продукция төргәкләрен күрсәтте.

Руслан Гыйззәтуллин вазыйфалы затларга бу проектларны тәкъдим иткән яшьләргә ярдәм күрсәтүне йөкләтте.