Хезмәткәрләрнең хокуклары бозыла

"Башавтотранс" дәүләт унитар предприятиясен тикшерү барышында Хезмәт инспекциясе инспекторлары Русия Федерациясенең Хезмәт кодексы тулысынча үтәлмәвен ачыкладылар. Мәсәлән, предприятиядә I категориянең ставкасы 3487 сум. "2020-2022 елларда Русия Федерациясенең юл һәм шәһәр җир пассажирларын ташу турындагы сәнәгать килешүе, 1 категориянең тариф ставкасы минималь хезмәт хакыннан ким булмаган күләмдә билгеләнде, 2020 елда ул 12130 сумга тигез иде", - диелә инспекция тикшерүендә.

Хезмәткәрләрне даими рәвештә артык эшләтү фактлары да ачыкланган. Мәсәлән, 2021 елның гыйнварында 120 сәгать нормасы булган диспетчерларның берсе 375 сәгать эшләгән, шуларның 105 сәгате - ял көннәрендә. "Нәтиҗәдә, хезмәткәр бер ай эчендә еллык максималь эш вакытын япкан ", - дип аңлатма бирә инспекция.

Хезмәткәрләрнең ялсыз эшләгән очраклары да теркәлгән: трактор йөртүчеләрнең берсе 10 көн ял итмичә, кер юучы - 9 көн; бер водительгә ике ел отпуска бирелмәгән. Диспетчерларның, күзәтүчеләрнең, кер юучыларның һәм чистартучыларның хезмәт контрактларында төнлә эшләгән өчен өстәмә түләү күләме билгеләнмәгән. Машина йөртүчеләр һәм электр газ эретеп ябыштыручылар контрактларында зарарлы һәм хәвефле шартларда эшләгәнгә компенсация каралмаган.

Дәүләт компаниясенең ике филиалының берничә водителе медицина тикшерүе узмаган. Аларны, медицина тикшерүе узганчы эштән читләштерделәр.

"Хокук бозуларны бетерү өчен күрсәтмәләр бирелде, административ һәм хокукый чаралар күрелде", - дип хәбәр ителә инспекция белдерүендә.