Ташкыннар алда әле

Безнең әзерлек нинди?

15 мартта БР Хөкүмәтендә Төбәк Башлыгы Радий Хәбиров уздырган оператив киңәшмәдә төбәкнең язгы ташуга әзерлеге һәм аны имин генә уздыру турында сөйләштеләр.

Гидрометеорология һәм тирә-як мохитне мониторинглау буенча республика идарәсе начальнигы Вилора Горохольская Башкортстанда язгы ташу фаразын хәбәр итте.

Аның сүзләренә караганда, бүгенге көндә түбәндәге шартлар туган: соңгы айларда явым-төшем мул булса да, кар суының быел нормадан ярты метрга кимрәк булуы көтелә. Агыйдел һәм Караидел елгаларында иң зур күләме нормадан 10 % түбәнрәк булачак, түбән урыннарны су басуы ихтимал. Анда ташкын көчле килсә дә, кыска вакытлы булачак, – диде Вилора Горохольская.

Республика Башлыгы Радий Хәбиров хәлне даими рәвештә мониторить итеп торырга, иң аянычлы хәлләргә дә әзер булырга кушты.

– Фаразлар яңартылгач, алда көтелгән ташкын турында мәгълүматны ачыклау өчен, 25 марттан да калмыйча, бөтен җаваплы хезмәтләр белән киңәшмә уздырырга, – диде Радий Хәбиров. – Уңай фаразлар саклыкны онытырга ярый дигәнне белдерми. Урыннардагы барлык җитәкчеләр дә ташкын белән бәйле йомшак мизгелләрне беләләр. Алар ни буласын аңларга һәм аңа юл куймаска тиешләр.

***

БР табигатьне файдалану һәм экология министры Урал Искәндәров белдерүенчә, республикада 100 һәм меңнән артык куб.м зурлыктагы 491 гидротехник корылма (ГТС) эксплуатацияләнә.

Тәүлегенә ике тапкыр һәр корылманың эшчәнлеге турында оператив – дежур диспетчер хезмәтләренә мәгълүмат җиткерелеп тора.

– Әле кар булып ятучы су запасын, ташкын күләмен ачыклау өчен 16 - 24 мартларда без тугыз иң зур сусаклагычта маршрутлы карны үлчәү эшен оештырачакбыз, – диде министр. – Бер үк вакытта, көтелмәгән хәлдә калмас өчен, һәр хәвефле тоелган объектта авариягә каршы күнекмәләр уздырачакбыз.

***

РФ Гадәттән тыш хәлләр идарәлегенең Башкортстан буенча бүлеге җитәкчесе урынбасары Эдуард Идрисов республикада оператив көч һәм чаралар туплануын белдерде. Анда 20 меңнән күбрәк кеше һәм 5 меңнән күбрәк техника һәм йөзү чаралары тупланган.

Зур куркынычлык астында булган һәм социаль мөһим объектлар, шулай ук үләт базлары, агу-химикат складлары, сәнәгать калдыкларын туплау зоналарының су астында калу куркынычы юк. 90 мең кеше вакытлыча яшәп торырлык 480 пункт әзерләнә.

– Без елгаларда боз тыгылу кукынычы булган урыннарны ачыклыйбыз, боз ташкынын киметү өчен анда бозны кисәчәкбез, – дип белдерде Эдуард Идрисов. – Шартлату эшләре таләп ителсә, Алкино-2да урнашкан сапер гаскәрләре әзер.