Күчмә сәүдә белән

Кооператив рәисе Елена Байкова әйтүенчә, үзизоляция чорында азык-төлекне йортка илтеп бирү, сәүдә нокталары булмаган авылларга күчмә сәүдә белән бару дәвам итә.

– Безнең кибет киштәләрендә башлыча район фермерлары һәм кооперативлары җитештергән продукция тора. Сөт, эремчек, каймак һәм катык – Калтайдан, икмәк – Яңа Кормаштан, колбаса, ит деликатеслары – кулланучылар җәмгыятеннән, туңдырылган яшелчә, пилмән, каен суы, йомырка һәм тавыклар «Татлы бакча» кооперативыннан. Заказ буенча кәҗә сөте сатабыз. Фермер Латыйпов сыр белән тәэмин итә, – дип сөйләде ул.

Мини-фургон график буенча һәр чәршәмбе, җомга һәм якшәмбе азык-төлек төяп, күчмә сәүдә белән юлга чыга.

Бу рәсемдә Якуп авылында сәүдә итү вакыты төшерелгән. Якуплылар тәгәрмәчле кибет килгәнне клуб янында көтеп торалар. Хатын-кызлар каймак, эремчек, икмәк, кондитер ашамлыклары, кыяр, помидор, токмач, төрле ярмалар сатып ала. Хәстәрлекле хуҗабикәләр яшелчә үсентеләренә һәм орлыкларына заказ бирә. Авыл халкы «Башкорт фермеры» кооперативына ихлас рәхмәт белдерә.